സപ്രാ

ആമുഖം

2009-04-27T19:31:00.025+05:30

ആമുഖം

“പ്രഭാത പ്രാര്‍ത്ഥനകള്‍‌‌‌ ” എന്നാണ് “സപ്രാ” എന്ന സുറിയാനി പദത്തിനര്‍ത്ഥം. കുടുംബങ്ങളിലെ ഉപയോഗത്തിന് സീറോ-മലബാര്‍ കത്തോലിക്കാ സഭയുടെ യാമപ്രാര്‍ത്ഥനകളില്‍ നിന്ന് ശേഖരിയ്ക്കപ്പെട്ടതാണു് ഇവിടെ ചേര്‍ത്തിരിക്കുന്ന പ്രാര്‍ത്ഥനകള്‍ .

ദിവസത്തിനനുസരിച്ചു ചൊല്ലേണ്ട കര്‍മ്മക്രമം മുകളിലെ ലിങ്കുകളില്‍ നിന്നു തിരഞ്ഞെടുക്കാവുന്നതാണു്.

യാമപ്രാര്‍ത്ഥനകളെക്കുറിച്ച് കൂടുതലറിയുവാന്‍ തുടര്‍ന്നു വായിയ്ക്കുക:

യാമപ്രാര്‍ത്ഥന
ആരാധനാവത്സരവും കാലങ്ങളും
ശ്രദ്ധിക്കേണ്ട കാര്യങ്ങള്‍
സുറിയാനി പദങ്ങള്‍

യാമപ്രാര്‍ത്ഥന

സ്വര്‍ഗ്ഗത്തില്‍ നിത്യകാലത്തോളം ആലപിക്കുന്ന സ്തോത്രഗീതം മിശിഹാ തന്റെ മനുഷ്യാവതാരത്തിലൂടെ ഭൂമിയിലും ആരംഭിച്ചു. അതില്‍ മനുഷ്യവര്‍ഗ്ഗം മുഴുവനെയും പങ്കുകാരാക്കുന്ന മുഖ്യമായ ഒരു ഉപാധിയാണ് സഭയുടെ യാമപ്രര്‍ത്ഥനകള്‍ . അതുവഴി തിരുസഭ കര്‍ത്താവിനെ ഇടവിടാതെ സ്തുതിക്കുകയും സര്‍വ്വലോകത്തിന്റെയും രക്ഷയ്ക്കായി മാദ്ധ്യസ്ഥം വഹിക്കുകയും ചെയ്യുന്നു (SC 83). ഓരോ ദിവസത്തെയും വിശുദ്ധീകരിക്കുക എന്നതാണു് യാമപ്രാര്‍ത്ഥനയുടെ ലക്ഷ്യം (SC 83). ദൈവസ്തോത്രങ്ങള്‍ ആലപിച്ചുകൊണ്ട് ദിനരാത്രങ്ങള്‍ പൂര്‍ണ്ണമായി പവിത്രീകരിക്കാനുതകുന്ന രീതിയിലാണ് ഇത് സംവിധാനം ചെയ്യപ്പെട്ടിരിക്കുന്നത്. മിശിഹാ തന്റെ മൗതികശരീരമായ സഭയോടൊന്നിച്ച് പിതാവിന് സമര്‍പ്പിക്കുന്ന പ്രാര്‍ത്ഥനയാണ് യാമപ്രാര്‍ത്ഥന (SC 84). സഭയുടെ ശിരസ്സായ ഈശോയ്ക്ക് സഭ അര്‍പ്പിക്കുന്ന പ്രാര്‍ത്ഥനയാണിത്. കൂദാശകള്‍ , കൂദാശാനുകരണങ്ങള്‍ , യാമപ്രാര്‍ത്ഥന ഇവ ചേരുന്നതാണല്ലോ സഭയുടെ ഔദ്യോഗികമായ ആരാധനക്രമം.

സീറോ-മലബാര്‍ സഭയില്‍ സായംകാലപ്രാര്‍ത്ഥന (റംശാ), രാത്രിജപം (ലെലിയാ), പ്രഭാത നമസ്കാരം (സപ്രാ) ഇങ്ങനെ മൂന്നു യാമപ്രാര്‍ത്ഥനകളാണുള്ളത്. ദിവസം ആരംഭിക്കുന്നത് വൈകുന്നേരമായിട്ടാണ് കരുതുക. സഭാനിയമപ്രകാരം നിയുക്തരായ വ്യക്തികളുടെ നേതൃത്വത്തിലാണു് യാമപ്രാര്‍ത്ഥന നടത്തുന്നത്. അല്‍മായരും ഇതില്‍ പങ്കെടുക്കുന്ന പാരമ്പര്യമാണ് സീറോ-മലബാര്‍ സഭയില്‍ നിലവിലിരുന്നത്. അലസതകൂടാതെ എപ്പോഴും പ്രാര്‍ത്ഥിക്കണം എന്ന ദിവ്യനാഥന്റെ കല്പനയുടെ നിറവേറ്റലാണ് യാമപ്രാര്‍ത്ഥന. വ്യക്തിപരമായ പ്രാര്‍ത്ഥനാജീവിതത്തെ യാമപ്രാര്‍ത്ഥന പോഷിപ്പിക്കുകയും പുണ്യാഭിവൃദ്ധിയ്ക്ക് സഹായിക്കുകയും ചെയ്യുന്നു.

വിശുദ്ധ ഗ്രന്ഥത്തിലെ പ്രാര്‍ത്ഥനാഗീതങ്ങളായ സങ്കീര്‍ത്തനങ്ങളാണു് യാമപ്രാര്‍ത്ഥനകളുടെ പ്രധാനഭാഗം.

ആരാധനാവത്സരവും കാലങ്ങളും

ആരാധനാവത്സരം തുടര്‍ന്നു പറയുന്ന പ്രകാരം വിഭജിക്കപ്പെട്ടിരിക്കുന്നു: മംഗലവാര്‍ത്ത, ദനഹാ, നോമ്പ്, ഉയിര്‍പ്പ്, ശ്ലീഹാ, കൈത്താ, ഏലിയാ-ശ്ലീവാ, മൂശേ, പള്ളിക്കൂദാശ.

നൂറ്റാണ്ടുകളായി രക്ഷകനുവേണ്ടി കാത്തിരുന്ന ജനതയ്ക്ക് രക്ഷയുടെയും സന്തോഷത്തിന്റെയും സുവിശേഷമായ മിശിഹായെ ലഭിച്ചതിന്റെ അനുസ്മരണമാണു് മംഗലവാര്‍ത്തക്കാലം. രക്ഷാസന്ദേശം പൂര്‍ണ്ണമായി ഉള്‍ക്കൊണ്ട് രക്ഷകനെ ലോകത്തിനു് നല്കിയ പരിശുദ്ധ അമ്മയെയും മംഗലവാര്‍ത്തക്കാലത്ത് നമ്മള്‍ അനുസ്മരിച്ചാദരിക്കുന്നു. എല്ലാവര്‍ക്കും സേവനം ചെയ്തുകൊണ്ട് മനുഷ്യരക്ഷയ്ക്കുവേണ്ടി സ്വയം കയ്യാളിച്ച ദിവ്യഗുരുവിന്റെ പരസ്യജീവിതമാണു് ദനഹാക്കാലത്തില്‍ നാം അനുസ്മരിക്കുന്നത്. പശ്ചാത്താപവും അനുരഞ്ജനവും വഴി ആത്മവിശുദ്ധീകരണം പ്രാപിക്കാന്‍ നോമ്പുകാലം വഴിയൊരുക്കുന്നു.

മരിച്ച് ഉയിര്‍ത്തുകൊണ്ട് മരണത്തെ ജയിച്ച കര്‍ത്താവിന്റെ വിജയത്തെ ഉയിര്‍പ്പുകാലത്തില്‍ നാം ആഘോഷിക്കുന്നു. നിത്യം ജീവിക്കുന്ന മിശിഹായോടുകൂടി പ്രത്യാശയുടെ ജീവിതം നയിക്കാന്‍ ഉയിര്‍പ്പുകാലം നമ്മെ ആഹ്വാനം ചെയ്യുന്നു. പരിശുദ്ധാത്മാവിനാല്‍ പൂരിതരായി ശ്ലീഹന്മാര്‍ നാനാദിക്കുകളിലും സധൈര്യം സുവിശേഷം പ്രഘോഷിച്ചുകൊണ്ട് സഭയെ പടുത്തുയര്‍ത്തിയതിനെയാണു് ശ്ലീഹാക്കാലം അവതരിപ്പിക്കുന്നത്. ഇതിന്റെ തുടര്‍ച്ചയായിട്ടാണു് കൈത്താക്കാലത്തെ മനസ്സിലാക്കേണ്ടത്. മിശിഹായുടെ പ്രത്യാഗമനത്തെ ലക്ഷ്യമാക്കി സഭ നൂറ്റാണ്ടുകളിലൂടെ മുന്നേറുന്നതിനെ ഈ കാലം സൂചിപ്പിക്കുന്നു.

ഏലിയാ-സ്ലീവാക്കാലം ലോകാവസാനത്തെ സൂചിപ്പിക്കുന്നു. സെപ്‌റ്റംബര്‍ 14-നു് ആഘോഷിക്കുന്ന വി.സ്ലീവായുടെ തിരുനാള്‍ ഈ കാലത്തിലാണു്. കോണ്‍സ്റ്റന്റൈന്‍ ചക്രവര്‍ത്തിക്കുണ്ടായ ദര്‍ശനം, യുദ്ധത്തില്‍ അദ്ദേഹം നേടിയ വിജയം, ജറുസലേമില്‍ തിരുക്കല്ലറയുടെ മുകളില്‍ പണിത ദേവാലയത്തിന്റെ പ്രതിഷ്ഠ ഇവയെല്ലാം അനുസ്മരിപ്പിക്കുന്നു ഈ തിരുനാള്‍. തുടര്‍ന്നു വരുന്നത് മൂശെക്കാലമാണു്. താബോര്‍മലയില്‍ മഹത്വമണിഞ്ഞ ഈശോയുടെ ഇരുവശങ്ങളിലായി മൂശെയും ഏലിയായും കാണപ്പെട്ടതുപോലെ കുരിശിന്റെ മഹത്വത്തെ ആചരിക്കുന്ന തിരുനാളിനു മുമ്പും പിമ്പുമായി ഇവര്‍ ഇരുവരുടെയും പേരില്‍ രണ്ടുകാലം നിലകൊള്ളുന്നു.

അവസാനത്തേതായ പള്ളിക്കൂദാശക്കാലം മിശിഹായുടെ മണവാട്ടിയായ തിരുസ്സഭ സ്വര്‍ഗ്ഗീയ മണവറയില്‍ തന്റെ നിത്യമണവാളനോട് എന്നേക്കുമായി ചേര്‍ക്കപ്പെടുന്നത് സൂചിപ്പിക്കുന്നു.

സീറോ-മലബാര്‍ സഭയുടെ ആരാധനാവത്സരക്രമത്തെ പറ്റി കൂടുതല്‍ അറിയുവാന്‍ വിക്കിപീഡിയയിലെ ഈ ലേഖനം വായിക്കാവുന്നതാണു്.

ശ്രദ്ധിക്കേണ്ട കാര്യങ്ങള്‍

കൈക്കസ്തൂരി (സമാധാനാശംസ) കൊടുത്തുകൊണ്ടാണു് സപ്രാ ആരംഭിക്കേണ്ടതും അവസാനിപ്പിക്കേണ്ടതും. ഇത് അംഗങ്ങള്‍ തമ്മിലുള്ള ഹൃദയൈക്യത്തിന്റെ പ്രകാശനമാണു്. "ഈശോമിശിഹായ്ക്ക് സ്തുതിയായിരിക്കട്ടെ" എന്ന് പരസ്പരം ആശംസിച്ചുകൊണ്ട് പ്രാര്‍ത്ഥന അവസാനിപ്പിക്കുന്ന രീതി തുടരണം.

കാര്‍മ്മികന്റെ പ്രാര്‍ത്ഥനകള്‍ കുടുംബനാഥനോ കുടുംബനാഥന്റെ അഭാവത്തില്‍ കുടുംബനാഥയോ കുടുംബത്തിലെ മുതിര്‍ന്ന മറ്റംഗങ്ങളാരെങ്കിലുമോ ചൊല്ലേണ്ടതാണു്. പ്രാര്‍ത്ഥനകള്‍ ഭംഗിയായി ചൊല്ലാന്‍ കഴിവുള്ള ഏതെങ്കിലും ഒരംഗം ശുശ്രൂഷിയായി വര്‍ത്തിക്കുന്നു.

പ്രാര്‍ത്ഥനകളും ഗാനങ്ങളും സ്ഫുടമായും ആവശ്യത്തിനു് ശബ്ദമുയര്‍ത്തിയും നിര്‍ത്തിയും എല്ലാവരും ഒന്നിച്ചും ചൊല്ലേണ്ടതാണു്. എല്ലാവരും പുസ്തകമുപയോഗിച്ച് (അവസരത്തിനനുസരിച്ച്. ഇവിടെ അത് ഒരു പ്രിന്റ്-ഔട്ടോ, കംമ്പ്യൂട്ടര്‍ സ്ക്രീന്‍ തന്നെയുമോ ആവാം) പ്രാര്‍ത്ഥനയില്‍ പങ്കുകൊള്ളുവാന്‍ ശ്രദ്ധിയ്ക്കുക.

സഭയുടെ ഔദ്യോഗിക പ്രാര്‍ത്ഥന ആയതു കൊണ്ട് എല്ലാവരും എഴുന്നേറ്റുനിന്ന് സപ്രാ ചൊല്ലുന്നതാണു് പതിവ്. സങ്കീര്‍ത്തനങ്ങള്‍ ചൊല്ലുമ്പോഴും ഗാനങ്ങള്‍ ആലപിക്കുമ്പോഴും ഇരിക്കുന്നു.

വി. കുര്‍ബ്ബാനയും, മറ്റു കൂദാശകളും, കൂദാശാനുകരണങ്ങളും പോലെ യാമപ്രാര്‍ത്ഥനകള്‍ സഭയുടെ ആരാധനാക്രമത്തിന്റെ ഭാഗമാകയാല്‍ അത് മറ്റെല്ലാ പ്രാര്‍ത്ഥനകളെക്കാളും സ്വകാര്യഭക്താനുഷ്ഠാനങ്ങളെക്കാളും ശ്രേഷ്ഠവും ദൈവത്തിനു് സ്വീകാര്യവുമായിരിക്കും.

യാമപ്രാര്‍ത്ഥനയിലെ ചില സുറിയാനി പദങ്ങള്‍

സപ്രാ	-	പ്രഭാതജപം
റംശാ	-	സായാഹ്ന പ്രാര്‍ത്ഥനകള്‍
ലെലിയാ	-	രാത്രിജപം
ശൂറായാ	-	പ്രകീര്‍ത്തനം
ശൂബാഹാ	-	സ്തോത്രഗീതം
സ്ലോസാ	-	ജപം, പ്രാര്‍ത്ഥന
കാറോസൂസാ	-	പ്രഘോഷണ പ്രാര്‍ത്ഥന
ഹൂത്താമ്മാ	-	മുദ്രവയ്ക്കല്‍ പ്രാര്‍ത്ഥന
എങ്കര്‍ത്താ	-	ലേഖനം
തെശ്ബോഹത്താ	-	സ്തുതിഗീതം
ഓനീസാ ദക്ക്ദം	-	പൂര്‍വ്വഗീതം (സായാഹ്ന സങ്കീര്‍ത്തനത്തിനു മുമ്പ്)
ഓനീസാ ദ്ബാസര്‍	-	ഉത്തരഗീതം (സായാഹ്ന സങ്കീര്‍ത്തനത്തിനു ശേഷം)
ഓനീസാ ദ്‌റംശാ	-	സായാഹ്നഗീതം
ഓനീസാ ദ്‌ബാസാലിക്കേ	-	രാജഗീതം
ഓനീസാ ദ്‌മൗത്വാ	-	നിശാഗീതം
ഓനീസാ ദ്‌സപ്രാ	-	പ്രഭാതഗീതം
ബാറെക് കൊലഹോന്‍	-	കൃതജ്ഞതാഗാനം / കൃതജ്ഞതാ കീര്‍ത്തനം
ബ്‌മദ്‌നാഹൈ സപ്രാ	-	പ്രഭാതകീര്‍ത്തനം
മറിയാ ക്രോസാക്	-	സായാഹ്ന സങ്കീര്‍ത്തനം
ആസ്‌വാസാ	-	അക്ഷരമാലാനുസൃതമായി ഓരോ ഭാഗവും തുടങ്ങുന്ന രീതിയില്‍ വിരചിതമായ സങ്കീര്‍ത്തനങ്ങള്‍

intro

സാധാരണ ദിവസങ്ങളില്‍ ചൊല്ലേണ്ടത്

2009-04-26T20:08:00.063+05:30

സപ്രാ

പ്രഭാത പ്രാര്‍ത്ഥനകള്‍

(സാധാരണ ദിവസങ്ങളില്‍ ചൊല്ലേണ്ട ക്രമം)

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

(ദിവസത്തിന്റെ പ്രത്യേക സ്ലോസാ ഇല്ലെങ്കില്‍ താഴെ കൊടുത്തിരിക്കുന്നത് ചൊല്ലുന്നു)

സ്ലോസാ

കാര്‍മ്മി: കര്‍ത്താവേ, സൃഷ്ടികളെല്ലാം ആനന്ദപൂര്‍വ്വം അങ്ങയെ സ്തുതിച്ചാരാധിയ്ക്കുന്നു. എന്തുകൊണ്ടെന്നാല്‍ അനന്തവും അഗ്രാഹ്യവുമായ കാരുണ്യത്താല്‍ അങ്ങ് അവയെ സൃഷ്ടിച്ചു; അത്ഭുതകരമായി പരിപാലിച്ചുകൊണ്ടിരിക്കയും ചെയ്യുന്നു. സൃഷ്ടികള്‍ക്കു കാരണഭൂതനും ഞങ്ങളുടെ ആത്മാക്കളുടെ സംരക്ഷകനുമായ കര്‍ത്താവേ, പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

സങ്കീര്‍ത്തനത്തിന്റെ ആദ്യപാദം കാനോനയോടുകൂടെ മ്ശംശാന ചൊല്ലുമ്പോള്‍ ഒന്നാം ഗണം സങ്കീര്‍ത്തനവാക്യം ആവര്‍ത്തിക്കുകയും സമൂഹം തുടര്‍ന്നു ചൊല്ലി ത്രിത്വസ്തുതിയോടുകൂടെ അവസാനിപ്പിക്കുകയും ചെയ്യുന്നു. മ്ശംശാന സങ്കീര്‍ത്തനാരംഭം കാനോനയോടുകൂടെ ആവര്‍ത്തിച്ചശേഷം നമുക്കു പ്രാര്‍ത്ഥിക്കാം, സമാധാനം നമ്മോടുകൂടെ എന്നു ചൊല്ലുന്നു. മറ്റു സങ്കീര്‍ത്തനങ്ങളും ഇങ്ങനെതന്നെയാണ് ചൊല്ലേണ്ടത്.

മ്‌ശം: (സങ്കീ. 100) ഭൂവാസികളേ, കര്‍ത്താവിനെ സ്തുതിക്കുവിന്‍ (കാനോന) പ്രകാശദാതാവായ കര്‍ത്താവേ, നിനക്കു ഞങ്ങള്‍ സ്തുതി സമര്‍പ്പിക്കുന്നു.

ഭൂവാസികളേ, കര്‍ത്താവിനെ സ്തുതിക്കുവിന്‍
സന്തോഷപൂര്‍വ്വം അവിടുത്തെ പൂജിക്കുവിന്‍

കീര്‍ത്തനങ്ങള്‍ പാടിക്കൊണ്ട്
നമ്മുടെ കര്‍ത്താവും ദൈവവുമായ
അവിടുത്തെ തിരുമുമ്പില്‍ പ്രവേശിക്കുവിന്‍

അവിടുന്നു നമ്മുടെ സ്രഷ്ടാവാകുന്നു
നാം അവിടുത്തെ അജങ്ങളും ജനവുമാകുന്നു

സ്തോത്രങ്ങള്‍ പാടിക്കൊണ്ട്
അവിടുത്തെ വാതിലുകള്‍ കടക്കുവിന്‍

കീര്‍ത്തനങ്ങളാലപിച്ചുകൊണ്ട്
അങ്കണത്തിലേയ്ക്കു പ്രവേശിക്കുവിന്‍

നന്ദി നിറഞ്ഞ ഹൃദയത്തോടെ
അവിടുത്തെ നാമം കീര്‍ത്തിക്കുവിന്‍

കര്‍ത്താവു നല്ലവനും കാരുണ്യവാനുമാകുന്നു
അവിടുത്തെ വിശ്വസ്തത എന്നും നിലനില്‍ക്കും

പിതാവിനും പുത്രനും പരിശുദ്ധാത്മാവിനും സ്തുതി
ആദിമുതല്‍ എന്നേയ്ക്കും ആമ്മേന്‍

മ്‌ശം: ഭൂവാസികളേ, കര്‍ത്താവിനെ സ്തുതിക്കുവിന്‍ (കാനോന) പ്രകാശദാതാവായ കര്‍ത്താവേ, നിനക്കു ഞങ്ങള്‍ സ്തുതി സമര്‍പ്പിക്കുന്നു.
നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: കര്‍ത്താവേ, ഞങ്ങള്‍ അങ്ങയെ ആരാധിക്കയും അങ്ങേ തിരുനാമത്തെ പുകഴ്ത്തുകയും ചെയ്യുന്നു. എന്തുകൊണ്ടെന്നാല്‍ അങ്ങു സകലത്തിന്റെയും നാഥനും സ്രഷ്ടാവുമാകുന്നു. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

മ്‌ശം: (സങ്കീ. 91) അത്യുന്നതന്റെ സംരക്ഷണമുള്ളവനും ദൈവത്തിന്റെ തണലില്‍ ജീവിക്കുന്നവനും ഭാഗ്യവാനാകുന്നു. (കാനോനാ) ഞങ്ങളുടെ രക്ഷകനായ മിശിഹായേ, നിന്നിലുള്ള പ്രത്യാശ സ്തുത്യര്‍ഹമാകുന്നു.

അത്യുന്നതന്റെ സംരക്ഷണമുള്ളവനും
ദൈവത്തിന്റെ തണലില്‍ ജീവിക്കുന്നവനും ഭാഗ്യവാനാകുന്നു

“എന്റെ ആശ്രയവും സങ്കേതവും അങ്ങാകുന്നു” എന്ന്
കര്‍ത്താവിനോടു പറയുക

ദുഷ്ടന്മാരുടെ കെണിയില്‍ നിന്നും
വ്യര്‍ത്ഥമായ സംഭാഷണത്തില്‍ നിന്നും
അവിടുന്നു നിന്നെ രക്ഷിയ്ക്കും

തന്റെ തൂവലുകള്‍ കൊണ്ട്
അവിടുന്നു നിന്നെ മറച്ചുകൊള്ളും

തന്റെ ചിറകുകളുടെ കീഴില്‍
അവിടുന്നു നിന്നെ കാത്തുകൊള്ളും

രാത്രിയുടെ ഭീകരതയും
പകല്‍ പറക്കുന്ന അസ്ത്രവും
നീ ഭയപ്പെടേണ്ട

ഇരുട്ടില്‍ മുഴങ്ങുന്ന വചനവും
മദ്ധ്യാഹ്നത്തിലടിക്കുന്ന കൊടുങ്കാറ്റും
നീ ഒട്ടും പേടിക്കേണ്ട

ആയിരങ്ങള്‍ നിന്റെ പാര്‍ശ്വഭാഗത്തു വീഴും
പതിനായിരങ്ങള്‍ നിന്റെ വലതുഭാഗത്തും
എങ്കിലും അവരാരും നിന്നെ സ്പര്‍ശിക്കയില്ല

നീ അവരെയെല്ലാം കാണും
ദുഷ്ടനു കിട്ടുന്ന പ്രതിഫലം നീ ദര്‍ശിക്കും

നിന്റെ സങ്കേതം കര്‍ത്താവാകുന്നു
അത്യുന്നതന്‍ നിന്റെ കോട്ടയാകുന്നു

നിനക്കു യാതൊരു തിന്മയും വരുകയില്ല
ബാധകള്‍ നിന്റെ കൂടാരത്തെ ഉപദ്രവിക്കയില്ല

വഴികളില്‍ നിന്നെ സംരക്ഷിക്കുവാന്‍
അവിടുന്നു തന്റെ മാലാകാമാരോടു കല്പിക്കും

നിന്റെ പാദം കല്ലിന്മേല്‍ തട്ടാതെ
കരങ്ങളില്‍ നിന്നെ അവര്‍ വഹിച്ചുകൊള്ളും

സര്‍പ്പത്തിന്റെയും അണലിയുടെയും മേല്‍
നീ ചവിട്ടി നടക്കും

സിംഹത്തെയും പെരുമ്പാമ്പിനെയും
നീ ചവിട്ടി മെതിക്കും

എന്നോടു പ്രാര്‍ത്ഥിച്ചതു കൊണ്ട്
ഞാന്‍ അവനെ രക്ഷിയ്ക്കും

എന്റെ നാമം അറിഞ്ഞതു കൊണ്ട്
ഞാന്‍ അവനെ ശക്തിപ്പെടുത്തും

എന്നെ വിളിച്ചപേക്ഷിക്കുമ്പോള്‍
ഞാന്‍ അവന് ഉത്തരമരുളും

അവന്റെ സങ്കടകാലങ്ങളിലെല്ലാം
ഞാന്‍ അവന്റെ കൂടെ ഉണ്ടായിരിക്കും

ശക്തിയും ബഹുമാനവും അവനു ഞാന്‍ നല്‍കും
ദീര്‍ഘായുസ്സ് നല്‍കിക്കൊണ്ട് അവനെ ഞാന്‍ തൃപ്തനാക്കും
രക്ഷിയ്ക്കുവാനുള്ള എന്റെ കഴിവ് അവനെ കാണിക്കയും ചെയ്യും

പിതാവിനും പുത്രനും പരിശുദ്ധാത്മാവിനും സ്തുതി
ആദിമുതല്‍ എന്നേയ്ക്കും ആമ്മേന്‍

മ്‌ശം: അത്യുന്നതന്റെ സംരക്ഷണമുള്ളവനും ദൈവത്തിന്റെ തണലില്‍ ജീവിക്കുന്നവനും ഭാഗ്യവാനാകുന്നു. (കാനോനാ) ഞങ്ങളുടെ രക്ഷകനായ മിശിഹായേ, നിന്നിലുള്ള പ്രത്യാശ സ്തുത്യര്‍ഹമാകുന്നു.
നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: കര്‍ത്താവേ, അങ്ങേ പരിപാലന എത്രയും സ്തുത്യര്‍ഹമാകുന്നു. അങ്ങയെ ആശ്രയിക്കയും അങ്ങേ തിരുനാമം വിളിച്ചപേക്ഷിക്കയും ചെയ്യുന്നവര്‍ ഒരിക്കലും നിരാശരാവുകയില്ല. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

മ്‌ശം: (സങ്കീ. 104) എന്റെ ആത്മാവേ, കര്‍ത്താവിനെ സ്തുതിയ്ക്കുക. (കാനോന) കര്‍ത്താവിന്റെ മഹത്വം എന്നേയ്ക്കും.

എന്റെ ആത്മാവേ, കര്‍ത്താവിനെ സ്തുതിയ്ക്കുക
എന്റെ ദൈവമായ കര്‍ത്താവേ,
അങ്ങുന്ന് ഏറ്റവും വലിയവനാകുന്നു.

മഹത്വവും തേജസ്സും അങ്ങ് ധരിച്ചിരിയ്ക്കുന്നു
പ്രകാശം മേലങ്കിയായി അണിഞ്ഞിരിയ്ക്കുന്നു

കൂടാരത്തിന്റെ ആകൃതിയില്‍
ആകാശത്തെ അവിടുന്നു വിരിച്ചുനിര്‍ത്തി

വെള്ളത്തിനു മുകളിലായി
തന്റെ മാളികകള്‍ നിര്‍മ്മിച്ചു

മേഘങ്ങളെ വാഹനമാക്കി
കാറ്റിന്റെ ചിറകുകളില്‍ സഞ്ചരിച്ചു

അവന്‍ തന്റെ ദൂതന്മാരെ അശരീരികളായും
തന്റെ ശുശ്രൂഷകരെ ജ്വലിക്കുന്ന അഗ്നിയായും സൃഷ്ടിച്ചു

ഒരിക്കലും ഇളകാതിരിക്കുവാന്‍
ഭൂമിയെ അടിത്തറയിലുറപ്പിച്ചു

വസ്ത്രം കൊണ്ടെന്നപോലെ
ആഴികൊണ്ട് അതിനെ ആവരണം ചെയ്തു

വെള്ളം പര്‍വ്വതങ്ങള്‍ക്കു മീതെ നിന്നു
അവിടുന്നു കല്പിക്കുമ്പോള്‍ അതു പ്രവഹിക്കയും
ഇടിമുഴക്കുമ്പാള്‍ അതു വിറയ്ക്കയും ചെയുന്നു

അവിടുന്നു നിശ്ചയിച്ച സ്ഥാനങ്ങളില്‍
മലകളും താഴ്വരകളുമുണ്ടായി

ജലം ഭൂമിയെ മൂടാതിരിക്കുവാന്‍
അതിന് അതിരു നിശ്ചയിച്ചു

നീര്‍ച്ചാലുകളെ നദിയിലേയ്ക്കു തിരിച്ചുവിട്ടു
അവ മലയിടുക്കിലൂടെ ഒഴുകിപ്പോകുന്നു

വനത്തിലെ മൃഗങ്ങളെല്ലാം അവയില്‍നിന്നു കുടിക്കുന്നു
കാട്ടുകഴുതകളും ദാഹം തീര്‍ക്കുന്നു

ആകാശത്തിലെ പറവകള്‍ അവയ്ക്കു സമീപം കൂടുകെട്ടി
മരച്ചില്ലകളിലിരുന്ന് അവ പാട്ടുപാടി

മാളികയില്‍ നിന്ന് അവിടുന്നു മലകളെ നനയ്ക്കുന്നു
അവിടുത്തെ പ്രവൃത്തിയുടെ ഫലമനുഭവിച്ച്
ഭൂമി തൃപ്തിയടയുന്നു

അവിടുന്ന് മൃഗങ്ങള്‍ക്കുവേണ്ടി പുല്ലു മുളപ്പിക്കുന്നു
മനുഷ്യന് ആഹാരമുണ്ടാക്കുവാന്‍ സസ്യങ്ങള്‍ കിളിര്‍പ്പിക്കുന്നു

(കാനോനാ) കര്‍ത്താവിന്റെ മഹത്വം എന്നേയ്ക്കും

(സങ്കീ. 143) ആകാശമണ്ഡലത്തില്‍ കര്‍ത്താവിനെ സ്തുതിക്കുവിന്‍
അത്യുന്നതങ്ങളില്‍ അവിടുത്തെ പുകഴ്ത്തുവിന്‍

കര്‍ത്താവിന്റെ മാലാകാമാരേ, അവിടുത്തെ സ്തുതിക്കുവിന്‍
കര്‍ത്താവിന്റെ സൈന്യങ്ങളേ, അവിടുത്തെ പുകഴ്ത്തുവിന്‍

പകലോനേ, പനിമതിയേ, കര്‍ത്താവിനെ സ്തുതിക്കുവിന്‍
മിന്നിത്തിളങ്ങുന്ന നക്ഷത്രങ്ങളേ കര്‍ത്താവിനെ പുകഴ്ത്തുവിന്‍

അവിടുന്ന് അരുളിച്ചെയ്തപ്പോള്‍ അവയെല്ലാം ഉണ്ടായി
അവിടൂന്ന് ആജ്ഞാപിച്ചപ്പോള്‍ അവയെല്ലാം സൃഷ്ടിക്കപ്പെട്ടു

അവിടുന്ന് അവയെല്ലാം നിത്യകാലത്തേയ്ക്ക് സുസ്ഥിരമാക്കി
അലംഘ്യമായ നിയമവും അവയ്ക്കു നല്‍കി

ഭൂലോകത്തിലെങ്ങും കര്‍ത്താവിനെ സ്തുതിക്കുവിന്‍
അഗ്നിയേ, മഞ്ഞേ, കര്‍ത്താവിനെ സ്തുതിക്കുവിന്‍

ആലിപ്പഴമേ, മഞ്ഞുകട്ടയേ, കര്‍ത്താവിനെ സ്തുതിക്കുവിന്‍
കാറ്റേ, കൊടുങ്കാറ്റേ, കര്‍ത്താവിനെ സ്തുതിക്കുവിന്‍

അവിടുത്തെ ഒറ്റവാക്കാല്‍ അവയെല്ലാം സൃഷ്ടിക്കപ്പെട്ടു
പര്‍വ്വതങ്ങളേ, മലകളേ, കര്‍ത്താവിനെ സ്തുതിക്കുവിന്‍

ഫലവൃക്ഷങ്ങളേ, മലകളേ, കര്‍ത്താവിനെ സ്തുതിക്കുവിന്‍
വന്യമൃഗങ്ങളേ, നാല്‍ക്കാലികളേ, കര്‍ത്താവിനെ സ്തുതിക്കുവിന്‍

ഇഴജന്തുക്കളേ, പറവകളേ, കര്‍ത്താവിനെ സ്തുതിക്കുവിന്‍
രാജാക്കളേ, പ്രഭുക്കളേ, കര്‍ത്താവിനെ സ്തുതിക്കുവിന്‍

ന്യായാധിപന്മാരേ, ജനങ്ങളേ, കര്‍ത്താവിനെ സ്തുതിക്കുവിന്‍
യുവാക്കളേ, കന്യകമാരേ, കര്‍ത്താവിനെ സ്തുതിക്കുവിന്‍

വൃദ്ധരേ, ശിശുക്കളെ, കര്‍ത്താവിന്റെ നാമം കീര്‍ത്തിക്കുവിന്‍
അവിടുത്തെ തിരുനാമം ഉന്നതമാകുന്നു
ആകാശത്തിലും ഭൂമിയിലും അവിടുന്ന് പുകഴ്ത്തപ്പെടുന്നു

(സങ്കീ. 150) കര്‍ത്താവിന്റെ വിശുദ്ധ ഭവനത്തില്‍
അവിടുത്തെ സ്തുതിക്കുവിന്‍

പ്രതാപം നിറഞ്ഞ ആകാശത്തില്‍
അവിടുത്തെ പ്രകീര്‍ത്തിക്കുവിന്‍

കര്‍ത്താവിന്റെ ധീരകൃത്യങ്ങളെക്കുറിച്ച്
അവിടുത്തെ സ്തുതിക്കുവിന്‍

കാഹളമൂതിക്കൊണ്ട് അവിടുത്തെ സ്തുതിക്കുവിന്‍
വീണകളാലും കിന്നരങ്ങളാലും അവിടുത്തെ സ്തുതിക്കുവിന്‍

തപ്പുകളാലും മദ്ദളങ്ങളാലും അവിടുത്തെ സ്തുതിക്കുവിന്‍
ഇമ്പമുള്ള തന്ത്രികളാല്‍ അവിടുത്തെ സ്തുതിക്കുവിന്‍
കര്‍ണ്ണാനന്ദകരമായ കൈത്താളങ്ങളാല്‍ അവിടുത്തെ സ്തുതിക്കുവിന്‍

ആരവം കൊണ്ടും ആര്‍പ്പുവിളികൊണ്ടും
കര്‍ത്താവിനെ സ്തുതിക്കുവിന്‍
സര്‍വജീവജാലങ്ങളും കര്‍ത്താവിനെ സ്തുതിക്കട്ടെ

(സങ്കീ. 116) ജനപദങ്ങളേ, കര്‍ത്താവിനെ സ്തുതിക്കുവിന്‍
ഭൂവാസികളേ, കര്‍ത്താവിനെ പുകഴ്ത്തുവിന്‍

അവിടുത്തെ സ്നേഹം അനന്തമാകുന്നു
തന്റെ വാഗ്ദാനം അവിടുന്നു പൂര്‍ത്തിയാക്കുന്നു

മ്‌ശം: (കാനോനാ) എല്ലാ ശ്വാസോഛാസത്തിലും നമുക്കു കര്‍ത്താവിനെ സ്തുതിയ്ക്കാം. വെളിച്ചമായ മിശിഹായേ, ഞങ്ങള്‍ നിന്നെ സ്തുതിയ്ക്കുന്നു.
നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: കര്‍ത്താവേ, അനന്തവും അഗ്രാഹ്യവുമായ അങ്ങേ കാരുണ്യത്തെയോര്‍ത്ത് സൃഷ്ടികളെല്ലാം അങ്ങയെ സ്തുതിക്കുവാനും ആരാധിക്കുവാനും കടപ്പെട്ടിരിക്കുന്നു. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

കാര്‍മ്മി: സകലത്തിന്റെയും നാഥാ, നിന്നെ ഞങ്ങള്‍ സ്തുതിക്കുന്നു. ഈശോമിശിഹായേ, നിന്നെ ഞങ്ങള്‍ പുകഴ്ത്തുന്നു. എന്തുകൊണ്ടെന്നാല്‍ നീ ഞങ്ങളുടെ ശരീരങ്ങളെ ഉയിര്‍പ്പിക്കുന്നവനും ആത്മാക്കളെ രക്ഷിയ്ക്കുന്നവനുമാകുന്നു.

മ്‌ശം: കര്‍ത്താവേ, പ്രഭാതത്തില്‍ ഞാന്‍ ഒരുങ്ങി അങ്ങേ പക്കല്‍ വരുന്നു. എന്റെ പ്രാര്‍‌ത്ഥന കേള്‍ക്കണമേ.

സമൂ: സകലത്തിന്റെയും നാഥാ, നിന്നെ ഞങ്ങള്‍ സ്തുതിക്കുന്നു. ഈശോമിശിഹായേ, നിന്നെ ഞങ്ങള്‍ പുകഴ്ത്തുന്നു. എന്തുകൊണ്ടെന്നാല്‍ നീ ഞങ്ങളുടെ ശരീരങ്ങളെ ഉയിര്‍പ്പിക്കുന്നവനും ആത്മാക്കളെ രക്ഷിയ്ക്കുന്നവനുമാകുന്നു.

കാര്‍മ്മി: പിതാവിനും പുത്രനും പരിശുദ്ധാത്മാവിനും സ്തുതി. ആദിമുതല്‍ എന്നേയ്ക്കും ആമ്മേന്‍.
സകലത്തിന്റെയും നാഥാ, നിന്നെ ഞങ്ങള്‍ സ്തുതിക്കുന്നു. ഈശോമിശിഹായേ, നിന്നെ ഞങ്ങള്‍ പുകഴ്ത്തുന്നു. എന്തുകൊണ്ടെന്നാല്‍ നീ ഞങ്ങളുടെ ശരീരങ്ങളെ ഉയിര്‍പ്പിക്കുന്നവനും ആത്മാക്കളെ രക്ഷിയ്ക്കുന്നവനുമാകുന്നു.

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: അനാദിയായ ദൈവമേ, ഉന്നതനായ രാജാവേ, അങ്ങു ഞങ്ങളുടെ ശരീരങ്ങളെ ഉയിര്‍പ്പിക്കുന്നവനും ആത്മാക്കളെ രക്ഷിക്കുന്നവനുമാകുന്നു. അങ്ങയെ ഞങ്ങള്‍ ആരാധിക്കുകയും പുകഴ്ത്തുകയും ചെയ്യുന്നു. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

മ്‌ശം: (സങ്കീ. 51) ദൈവമേ, അങ്ങയുടെ കാരുണ്യത്തിനൊത്തവിധം എന്നോടു കരുണ തോന്നണമേ: അങ്ങയുടെ കാരുണ്യാതിരേകത്തിനനുസരിച്ച് എന്റെ പാപങ്ങള്‍ മായിച്ചുകളയുകയും ചെയ്യണമേ.
(കാനോനാ) കര്‍ത്താവേ, എന്നില്‍ കനിയണമേ, ദൈവമേ, എന്നില്‍ കനിയണമേ; കര്‍ത്താവേ, എന്നില്‍ കനിയണമേ.

(സമൂഹം രണ്ടുഗണമായി)

ദൈവമേ അങ്ങയുടെ കാരുണ്യത്തിനൊത്തവിധം...

എന്റെ അപരാധങ്ങള്‍ നിശ്ശേഷം കഴുകിക്കളയണമേ
പാപങ്ങളില്‍ നിന്ന് എന്നെ ശുദ്ധീകരിക്കണമേ

എന്തുകൊണ്ടെന്നാല്‍ എന്റെ പാപങ്ങള്‍ ഞാനറിയുന്നു
അവയെല്ലാം എപ്പോഴും എനിക്കെതിരെ നില്‍ക്കുന്നു

അങ്ങേയ്ക്കെതിരായി ഞാന്‍ പാപം ചെയ്തുപോയി
അങ്ങയുടെ സന്നിധിയില്‍ ഞാന്‍ തിന്മകള്‍ പ്രവര്‍ത്തിച്ചു.

(നോമ്പുകാലത്ത് താഴെ വരുന്നവയും ചൊല്ലുന്നു)

അങ്ങയുടെ വചനങ്ങള്‍ നീതിയുക്തമാകുന്നു
അങ്ങയുടെ വിധികള്‍ കുറ്റമറ്റതാകുന്നു

പാപത്തോടെയാണ് ഞാന്‍ പിറന്നത്
ഉത്ഭവം മുതലേ ഞാന്‍ പാപിയാകുന്നു

അങ്ങു സത്യത്തില്‍ പ്രസാദിച്ചു
അങ്ങയുടെ ജ്ഞാനത്തിന്റെ രഹസ്യങ്ങള്‍ എനിയ്ക്കു വെളിപ്പെടുത്തി

സോപ്പാ കൊണ്ടെന്നെ തളിക്കണമേ
അപ്പോള്‍ ഞാന്‍ നിര്‍മ്മലനാകും

അതില്‍ എന്നെ കഴുകണമേ
ഞാന്‍ മഞ്ഞിനെക്കാള്‍ വെണ്മയുള്ളവനാകും

അങ്ങയുടെ സന്തോഷം എനിയ്ക്കു നല്‍കണമേ
അപ്പോള്‍ ഞാന്‍ ആനന്ദഭരിതനാകും

എന്റെ പാപങ്ങളില്‍ നിന്നു മുഖം തിരിക്കണമേ
എന്റെ തെറ്റുകളെല്ലാം മായിച്ചുകളയണമേ

ദൈവമേ, നിര്‍മ്മലമായ ഹൃദയം എന്നില്‍ സൃഷ്ടിക്കണമേ
അങ്ങയുടെ ചൈതന്യം എന്റെ ഉള്ളില്‍ നവീകരിക്കണമേ

അങ്ങയുടെ സന്നിധിയില്‍ നിന്നെന്നെ തള്ളിക്കളയരുതേ
അങ്ങയുടെ പരിശുദ്ധമായ ചൈതന്യം എന്നില്‍ നിന്നെടുത്തുകളയരുതേ

അങ്ങയുടെ ആനന്ദവും രക്ഷയും എനിക്കു വീണ്ടും തരണമേ
അങ്ങയുടെ സ്തുത്യമായ ചൈതന്യം എന്നെ താങ്ങിനിര്‍ത്തട്ടെ.

ദുഷ്ടരെ ഞാന്‍ അങ്ങയുടെ വഴി പഠിപ്പിക്കുന്നതിനും
പാപികള്‍ അങ്ങയുടെ പക്കലേയ്ക്കു പിന്തിരിയുന്നതിനും ഇടയാകട്ടെ

എന്നെ നീതീകരിക്കുന്ന ദൈവമേ,
രക്തപാതകത്തില്‍ നിന്ന് എന്നെ രക്ഷിക്കേണമേ

എന്റെ നാവ് അങ്ങയുടെ നീതിയെ സ്തുതിക്കും
കര്‍ത്താവേ, എന്റെ അധരങ്ങള്‍ തുറക്കണമേ
എന്റെ വായ് അങ്ങയുടെ സ്തുതികള്‍ ഉരുവിടട്ടെ

എന്തുകൊണ്ടെന്നാല്‍ ബലികളില്‍ അങ്ങ് സം‌പ്രീതനായില്ല
ദഹനബലികളിലും സന്തുഷ്ടനായില്ല

ദൈവത്തിനുള്ള ബലി വിനയമുള്ള മനസ്സാണ്
തകര്‍ന്ന ഹൃദയത്തെ ദൈവം നിരസിക്കുകയില്ല

അങ്ങയുടെ ഇഷ്ടാനുസരണം സെഹിയോന് നന്മ ചെയ്യണമേ
ഓറെശ്ലത്തിന്റെ കോട്ടകള്‍ പണിയണമേ

അപ്പോള്‍ നീതിയുടെ ബലികളിലും ഹോമബലികളിലും അങ്ങ് സം‌പ്രീതനാകും
അങ്ങയുടെ ബലിപീഠത്തില്‍ അവര്‍ കാളകളെ ബലിയര്‍പ്പിക്കുകയും ചെയ്യും

മ്‌ശം: ദൈവമേ, അങ്ങയുടെ കാരുണ്യത്തിനൊത്തവിധം എന്നോടു കരുണ തോന്നണമേ: അങ്ങയുടെ കാരുണ്യാതിരേകത്തിനനുസരിച്ച് എന്റെ പാപങ്ങള്‍ മായിച്ചുകളയുകയും ചെയ്യണമേ.
(കാനോനാ) കര്‍ത്താവേ, എന്നില്‍ കനിയണമേ, ദൈവമേ, എന്നില്‍ കനിയണമേ; കര്‍ത്താവേ, എന്നില്‍ കനിയണമേ.

തെ‌ശ്‌ബൊഹത്താ
(രീതി: മറിയാബസപ്രാ...
ബ്‌എന്താന്‍‌സപ്രാ/സമയമടുത്തു ദൈവമിതാ...)

അഖിലേശാ, നിന്‍ തിരുമുമ്പില്‍
സ്തോത്രം ഞങ്ങളണയ്ക്കുന്നു
സ്തുതിഗീതങ്ങള്‍ പാടുന്നു.
കര്‍ത്താവേ, നിന്‍ കൃപയാലേ
സ്രഷ്ടാവാം നിന്‍ കാരുണ്യം
ഞങ്ങള്‍ വാഴ്ത്തിടുമെന്നാളും.

രക്ഷകനേ, നിന്‍ കരമിവരെ
സദയം താങ്ങുന്നനുനിമിഷം
സതതം കാത്തുനയിക്കുന്നു
കര്‍ത്താവേ, നിന്‍ ദൈവത്വം
അരാധിച്ചു വണങ്ങിടുമീ
ഞങ്ങളിലനിശം കനിയണമേ.

ശാന്തത നിറയും തുറമുഖമേ,
കരുണാപൂരം ചൊരിയണമേ,
തനയരെയലിവൊടു നോക്കണമേ.
കര്‍ത്താവേ, നിന്‍ തിരുവദനം,
നിന്‍പ്രഭയിവരില്‍ ചൊരിയട്ടെ
ഞങ്ങള്‍ രക്ഷിതരാകട്ടെ.

അനുതാപികളെ കൃപയോടെ
കൈക്കൊള്ളുന്ന ദയാനിധേ,
ഞങ്ങള്‍ക്കഭയം നീയല്ലോ.
പ്രാര്‍ത്ഥന സദയം കേള്‍ക്കണമേ
ആരാധകരുടെ നിലവിളികള്‍
നിന്‍ തിരുസന്നിധിയണയട്ടെ.

മര്‍ത്യകടങ്ങള്‍ നീര്‍പ്പവനേ,
അടിയാര്‍തന്‍ കടബാദ്ധ്യതകള്‍
നിന്‍ കൃപയാല്‍ നീ നീക്കണമേ.
നരകുലപാപം പോക്കും നീ
പാപക്കറകള്‍ മായ്ക്കണമേ
നിരവധിയെങ്കിലുമലിവോടെ.

നരവംശത്തിനുത്തമമാം
ശരണം നാഥാ, നീയല്ലോ
ചൊരിയണമേ തവ ശാന്തി സദാ,
പരിപാവനമാം ത്രിത്വത്തിന്‍
നാമം നിതരാം വാഴ്ത്തിടുവാന്‍
നരനു പുരോഗതി നല്‍കണമേ!

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: മനുഷ്യവര്‍ഗ്ഗത്തിന്റെ ശരണവും സമാധാനത്തിന്റെ തുറമുഖവുമായ മിശിഹായേ, ഞങ്ങളുടെ ജീവിതകാലം മുഴുവന്‍ അങ്ങയെ സ്തുതിക്കുവാന്‍ വേണ്ടി അങ്ങയുടെ ശാന്തിയും സമാധാനവും ഞങ്ങള്‍ക്കു തരണമേ. സകലത്തിന്റെയും നാഥാ, എന്നേയ്ക്കും.

സമൂ: ആമ്മേന്‍

മ്‌ശം: സഹോദരരേ, നമുക്കു സ്വരമുയര്‍ത്തി സജീവനായ ദൈവത്തെ പ്രകീര്‍ത്തിക്കാം.
സമൂ:

പരിപാവനനാം സര്‍വ്വേശാ
പരിപാവനനാം ബലവാനേ,
പരിപാവനനാമമര്‍ത്യനേ,
നിന്‍‌‌കൃപ ഞങ്ങള്‍ക്കേകണമേ. (3 പ്രാവശ്യം)

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: കര്‍ത്താവേ, അങ്ങേ നാമം പരിശുദ്ധമാകുന്നു. നല്ലവനേ, അങ്ങയുടെ കാരുണ്യം അനന്തമാകുന്നു. അങ്ങയെ വിളിച്ചപേക്ഷിക്കുന്ന പാപികളായ ഞങ്ങളുടെമേല്‍ അനുഗ്രഹം വര്‍ഷിക്കണമേ. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.
സമൂ: ആമ്മേന്‍

ഒനീസാ ദ്സപ്രാ (ദിവസത്തിന്റേത്)

അല്പം കാക്കുക; ഇന്നത്തെ കീര്‍ത്തനത്തിനായി തിരയുന്നു...

ബ്മദ്നാഹൈ സപ്രാ (പ്രഭാതകീര്‍ത്തനം)
(രീതി: മെത്തോല്‍ദ് മറിയം ബ്സുല്‍ത്താ)

പുലരിപ്രഭയില്‍ കര്‍ത്താവേ,
സാമോദം നിന്‍ ദാസരിതാ
സൃഷ്ടിക്കഖിലം രക്ഷകനാം
നിന്‍സ്തുതിഗീതം പാടുന്നു.

സകലേശാ, നിന്‍ കൃപയാലേ
ശാന്തി നിറഞ്ഞൊരു ദിനവും നീ
പാപപ്പൊറുതിയുമരുളണമേ
നന്മയിലൂടെ നയിക്കണമേ.

ശരണം പൊലിയാതെന്നാളും
സുതരെക്കാത്തരുളീടണമേ
ഞങ്ങള്‍ക്കെതിരായൊരുനാളും
വാതിലടയ്ക്കരുതഖിലേശാ

നരവംശത്തിന്‍ വൈകല്യം
അറിയും താതാ, കനിയണമേ
അര്‍ഹതനോക്കാതവികലമായ്
പ്രതിസമ്മാനം നല്‍കണമേ

സ്നേഹവുമൈക്യവുനന്യൂനം
ശാന്തിയുമിവിടെ വിതയ്ക്കണമേ
അജപാലനമൊരു കുറവെന്യേ
ഫലമേകാനിടയാക്കണമേ

ആരോഗ്യം നരനേകണമേ
രോഗികളെ സുഖമാക്കണമേ
മര്‍ത്യഗണത്തിന്‍ പാപങ്ങള്‍
കഴുകി വിശുദ്ധി വളര്‍ത്തണമേ

ശാവോലില്‍ നിന്നെളിയവനാം
ദാവീദിനെയെന്നതുപോലെ
വഴികളിലെല്ലാം നിന്‍കരതാര്‍
ഞങ്ങളെ രക്ഷിച്ചരുളട്ടെ

നിന്‍ഹിതമൊത്തിവരീനാളില്‍
വയ്‌ക്കും ചുവടുകളോരോന്നും
ശാന്തതയോടെ വിജയത്തില്‍
ചെന്നെത്താനിടയാക്കണമേ

മൂശെയ്‌ക്കും നിന്‍ ജനതയ്‌ക്കും
കടലില്‍ രക്ഷകൊടുത്തവനേ,
സിംഹക്കുഴിയിലടിഞ്ഞവനില്‍
രക്ഷകനിഞ്ഞു പൊഴിച്ചവനേ,

അഗ്നിയിലന്നാ ബാലകരെ
കാത്തുസുരക്ഷിതരാക്കിയ നീ
ദുഷ്ടപിശാചില്‍ നിന്നിവരെ
സദയം രക്ഷിച്ചരുളണമേ.

കതിരവനൊത്തിവരുണരുന്നു
താതനെയാരാധിക്കുന്നു
തനയനു സ്തോത്രമണയ്ക്കുന്നു
റൂഹയെ ഞങ്ങള്‍ വാഴ്‌ത്തുന്നു

ദൈവപിതാവിന്‍ കൃപയും തന്‍
വത്സലസുതനുടെ കരളലിവും
റൂഹാതന്‍ ദിവ്യാഗമവും
നിത്യം തുണയരുളീടട്ടെ

നാഥാ, ദിവ്യഭിഷഗ്വരനേ
നരനിഹശരണം നീയല്ലോ,
നാശം വന്നുഭവിയ്ക്കായ്‌വാന്‍
കരുണയുടൗഷധമേകണമേ.

നിന്‍ കല്പനകള്‍ കാത്തിടുവാന്‍
ശക്തിയശേഷമിവര്‍ക്കില്ല
ആരാധകരാം ഞങ്ങളെ നീ
കാത്തു തുണയ്ക്കുക മിശിഹായേ.

അനുതാപികളെ കൈക്കൊള്‍വാന്‍
വാതില്‍ തുറന്നു പ്രതീക്ഷിയ്ക്കും
കരുണാമയനൊടു പാപത്തിന്‍
പൊറുതി നമുക്കുമിരന്നീടാം.

ദിനമനുഞങ്ങള്‍ വാഗ്ദാനം
ചെയ്യുന്നെങ്കിലുമപരാധം
പെരുകിവരുന്നു കര്‍ത്താവേ,
കനിവിന്‍ കിരണം ചൊരിയണമേ.

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: നീതിമാനും നല്ലവനും കരുണാനിധിയുമാക കര്‍ത്താവേ, അങ്ങയുടെ നാമം പരിശുദ്ധമാകുന്നു. അങ്ങയെ വിളിച്ചപേക്ഷിയ്ക്കുന്ന ആരാധകരായ ഞങ്ങളില്‍ അങ്ങയുടെ സ്നേഹമാധുര്യം വര്‍ഷിക്കേണമേ. ആപത്തുകളില്‍ നിന്നും ഞങ്ങളെ കാത്തുരക്ഷിയ്‌ക്കുകയും, സ്നേഹം നിറഞ്ഞ പരിപാലനയുടെ തണലില്‍ ഞങ്ങളെ സംരക്ഷിക്കുകയും ചെയ്യേണമേ. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍
മ്‌ശം: കര്‍ത്താവേ, അനുഗ്രഹിക്കണമേ.

ദ്ഉദ്റാനാ
(സഹായാഭ്യര്‍ത്ഥന)

കാര്‍മ്മി: കര്‍ത്താവേ, അങ്ങേ മഹത്വമേറിയ ത്രിത്വത്തിന്റെ നിഗൂഢമായ ശക്തിയും അനന്തമായ അനുഗ്രഹവും നിരന്തരമായ സഹായവും ഞങ്ങള്‍ക്കു ലഭിക്കുമാറാകട്ടെ. പരിശുദ്ധ കന്യകാമറിയത്തിന്റെ അപേക്ഷയും മാര്‍ യൗസേപ്പിന്റെയും വിശുദ്ധ ശ്ലീഹന്‍മാരുടെയും പ്രാര്‍ത്ഥനകളും മാര്‍ തൊമ്മാശ്ലീഹായുടെയും മാര്‍ ഗീവര്‍ഗീസിന്റെയും മറ്റു വേദസാക്ഷികളുടെയും മല്പാന്മാരുടെയും ഈ പള്ളിയുടെ (ഭവനത്തിന്റെ) മദ്ധ്യസ്ഥനായ (മദ്ധ്യസ്ഥ) ... യും മറ്റു സകല വിശുദ്ധരുടെയും മദ്ധ്യസ്ഥതയും ഞങ്ങളെ സഹായിക്കുമാറാകട്ടെ. അവ ഞങ്ങള്‍ക്കഭയവും സഹായവും ദുഷ്ടപിശാചിലും അവന്റെ സൈന്യങ്ങളിലും നിന്നു സംരക്ഷണവും നല്കി നിത്യഭാഗ്യത്തിലേയ്‌ക്കു ഞങ്ങളെ നയിക്കുമാറാകട്ടെ. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍
മ്‌ശം: കര്‍ത്താവേ, അനുഗ്രഹിക്കണമേ.

ഹുത്താമ്മാ
(മുദ്രവയ്‌ക്കല്‍)

കാര്‍മ്മി: ഞങ്ങളുടെ ദൈവമായ കര്‍ത്താവേ, പീഡയനുഭവിക്കുന്നവരെ ആശ്വസിപ്പിക്കുകയും രോഗികള്‍ക്കു സുഖം നല്‍കുകയും ദരിദ്രരെ സംരക്ഷിക്കുകയും ചെയ്യേണമേ. പാപികള്‍ക്കു പശ്ചാത്താപവും മരിച്ചവര്‍ക്കു സ്വര്‍ഗ്ഗഭാഗ്യവും നീതിമാന്മാര്‍ക്കു സന്തോഷവും പ്രദാനം ചെയ്യേണമേ. ഒരിക്കല്‍ കൂടി പ്രഭാതം കാണുവാന്‍ ഭാഗ്യം ലഭിച്ച ഞങ്ങളെ എല്ലാവരെയും സമൃദ്ധമായി അനുഗ്രഹിക്കേണമേ. ഇപ്പോഴും + എപ്പോഴും എന്നേയ്ക്കും.

സമൂ: ആമ്മേന്‍

ordinaryDays

ഞായര്‍ / തിരുനാള്‍ ദിവസങ്ങളില്‍ ചൊല്ലേണ്ടത്

2009-04-19T20:09:00.026+05:30

സപ്രാ

പ്രഭാത പ്രാര്‍ത്ഥനകള്‍

(ഞായറാഴ്‌ചകളിലും തിരുനാളുകളിലും ചൊല്ലേണ്ട ക്രമം)

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

(തിരുനാളിന്റെ പ്രത്യേക സ്ലോസാ ഇല്ലെങ്കില്‍ താഴെ കൊടുത്തിരിക്കുന്നത് ചൊല്ലുന്നു)

സ്ലോസാ

കാര്‍മ്മി: കര്‍ത്താവേ, അങ്ങേ പ്രകാശം ഞങ്ങളില്‍ വീശുകയും അങ്ങേ ആഗമനത്താല്‍ ഞങ്ങളെ ആനന്ദിപ്പിക്കുകയും ചെയ്യണമേ. നിന്റെ ദിവ്യരഹസ്യത്തില്‍ ഞങ്ങളെ പങ്കാളികളാക്കണമേ. മാലാഖാമാരുടെ ഗണങ്ങളോടുകൂടെ അങ്ങേ ആരാധ്യമായ ത്രിത്വത്തെ കൃതജ്ഞതാപൂര്‍വ്വം പാടിപ്പുകഴ്‌ത്തുവാന്‍ ഞങ്ങളെ യോഗ്യരാക്കണമേ. സകലത്തിന്മേലും അധികാരമുള്ള സ്രഷ്ടാവും സൃഷ്ടികളുടെ സേവനം ആവശ്യമില്ലാത്തവനും തന്റെ ജ്ഞാനത്തില്‍ ഭൗമീയര്‍ക്കും മാലാഖാമാര്‍ക്കും അപ്രാപ്യനും സകലത്തിന്റെയും നാഥനും പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

അവിടുന്നു നമ്മുടെ സ്രഷ്ടാവാകുന്നു
നാം അവിടുത്തെ അജങ്ങളും ജനവുമാകുന്നു

സ്തോത്രങ്ങള്‍ പാടിക്കൊണ്ട്
അവിടുത്തെ വാതിലുകള്‍ കടക്കുവിന്‍

കീര്‍ത്തനങ്ങളാലപിച്ചുകൊണ്ട്
അങ്കണത്തിലേയ്ക്കു പ്രവേശിക്കുവിന്‍

നന്ദി നിറഞ്ഞ ഹൃദയത്തോടെ
അവിടുത്തെ നാമം കീര്‍ത്തിക്കുവിന്‍

സ്ലോസാ

കാര്‍മ്മി: ഞങ്ങളുടെ ദൈവമായ കര്‍ത്താവേ, ഞങ്ങളങ്ങേയ്ക്കു സ്തുതിയും സ്തോത്രവുമര്‍പ്പിക്കുന്നു. എന്തുകൊണ്ടെന്നാല്‍ അങ്ങു സകലത്തിന്റെയും നാഥനും സ്രഷ്ടാവും സകലര്‍ക്കും പ്രകാശം നല്‌കുന്നവനുമാകുന്നു. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

മ്‌ശം: (സങ്കീ. 91) അത്യുന്നതന്റെ സംരക്ഷണമുള്ളവനും ദൈവത്തിന്റെ തണലില്‍ ജീവിക്കുന്നവനും ഭാഗ്യവാനാകുന്നു. (കാനോനാ) ഞങ്ങളുടെ രക്ഷകനായ മിശിഹായേ, നിന്നിലുള്ള പ്രത്യാശ സ്തുത്യര്‍ഹമാകുന്നു.

അത്യുന്നതന്റെ സംരക്ഷണമുള്ളവനും
ദൈവത്തിന്റെ തണലില്‍ ജീവിക്കുന്നവനും ഭാഗ്യവാനാകുന്നു

“എന്റെ ആശ്രയവും സങ്കേതവും അങ്ങാകുന്നു” എന്ന്
കര്‍ത്താവിനോടു പറയുക

തന്റെ തൂവലുകള്‍ കൊണ്ട്
അവിടുന്നു നിന്നെ മറച്ചുകൊള്ളും

തന്റെ ചിറകുകളുടെ കീഴില്‍
അവിടുന്നു നിന്നെ കാത്തുകൊള്ളും

രാത്രിയുടെ ഭീകരതയും
പകല്‍ പറക്കുന്ന അസ്ത്രവും
നീ ഭയപ്പെടേണ്ട

നീ അവരെയെല്ലാം കാണും
ദുഷ്ടനു കിട്ടുന്ന പ്രതിഫലം നീ ദര്‍ശിക്കും

നിന്റെ സങ്കേതം കര്‍ത്താവാകുന്നു
അത്യുന്നതന്‍ നിന്റെ കോട്ടയാകുന്നു

നിന്റെ പാദം കല്ലിന്മേല്‍ തട്ടാതെ
കരങ്ങളില്‍ നിന്നെ അവര്‍ വഹിച്ചുകൊള്ളും

സര്‍പ്പത്തിന്റെയും അണലിയുടെയും മേല്‍
നീ ചവിട്ടി നടക്കും

സിംഹത്തെയും പെരുമ്പാമ്പിനെയും
നീ ചവിട്ടി മെതിക്കും

എന്നോടു പ്രാര്‍ത്ഥിച്ചതു കൊണ്ട്
ഞാന്‍ അവനെ രക്ഷിയ്ക്കും

എന്റെ നാമം അറിഞ്ഞതു കൊണ്ട്
ഞാന്‍ അവനെ ശക്തിപ്പെടുത്തും

എന്നെ വിളിച്ചപേക്ഷിക്കുമ്പോള്‍
ഞാന്‍ അവന് ഉത്തരമരുളും

അവന്റെ സങ്കടകാലങ്ങളിലെല്ലാം
ഞാന്‍ അവന്റെ കൂടെ ഉണ്ടായിരിക്കും

സ്ലോസാ

കാര്‍മ്മി: മനുഷ്യവര്‍ഗ്ഗത്തിന്റെ സ്രഷ്ടാവും പരിപാലകനുമായ കര്‍ത്താവേ, അങ്ങു ഞങ്ങളുടെ സങ്കേതവും ആശ്രയവുമാകുന്നു. അങ്ങില്‍ അഭയം തേടുകയും അങ്ങേ നാമം വിളിച്ചപേക്ഷിക്കയും ചെയ്യുന്നവര്‍ ഒരിക്കലും നിരാശരാവുകയില്ല. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

മ്‌ശം: (സങ്കീ. 104) എന്റെ ആത്മാവേ, കര്‍ത്താവിനെ സ്തുതിയ്ക്കുക. (കാനോന) ദൈവമേ സ്തുതി അങ്ങേയ്ക്കു യോജ്യമാകുന്നു.

എന്റെ ആത്മാവേ, കര്‍ത്താവിനെ സ്തുതിയ്ക്കുക
എന്റെ ദൈവമായ കര്‍ത്താവേ,
അങ്ങുന്ന് ഏറ്റവും വലിയവനാകുന്നു.

കൂടാരത്തിന്റെ ആകൃതിയില്‍
ആകാശത്തെ അവിടുന്നു വിരിച്ചുനിര്‍ത്തി

വെള്ളത്തിനു മുകളിലായി
തന്റെ മാളികകള്‍ നിര്‍മ്മിച്ചു

മേഘങ്ങളെ വാഹനമാക്കി
കാറ്റിന്റെ ചിറകുകളില്‍ സഞ്ചരിച്ചു

ഒരിക്കലും ഇളകാതിരിക്കുവാന്‍
ഭൂമിയെ അടിത്തറയിലുറപ്പിച്ചു

വസ്ത്രം കൊണ്ടെന്നപോലെ
ആഴികൊണ്ട് അതിനെ ആവരണം ചെയ്തു

അവിടുന്നു നിശ്ചയിച്ച സ്ഥാനങ്ങളില്‍
മലകളും താഴ്വരകളുമുണ്ടായി

ജലം ഭൂമിയെ മൂടാതിരിക്കുവാന്‍
അതിന് അതിരു നിശ്ചയിച്ചു

പിതാവിനും പുത്രനും പരിശുദ്ധാത്മാവിനും സ്തുതി
ആദിമുതല്‍ എന്നേയ്ക്കും ആമ്മേന്‍

മ്‌ശം: എന്റെ ആത്മാവേ, കര്‍ത്താവിനെ സ്തുതിയ്ക്കുക. (കാനോനാ) ദൈവമേ സ്തുതി അങ്ങേയ്ക്കു യോജ്യമാകുന്നു.
നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: സ്വര്‍ഗ്ഗീയമായ തേജസ്സിനാല്‍ സകല സൃഷ്ടികളെയും ആനന്ദിപ്പിക്കുന്ന കര്‍ത്താവേ, പ്രകാശത്തിന്റെ സൃഷ്ടാവും തന്റെ കരുണയാല്‍ ഇരുളിനെ ക്രമപ്പെടുത്തിയിരിക്കുന്നവനും അങ്ങാകുന്നു. ഞങ്ങള്‍ അങ്ങേ ആരാധിക്കയും പുകഴ്‌ത്തുകയും ചെയ്യുന്നു. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

മ്‌ശം: (സങ്കീ. 93) കര്‍ത്താവു മഹത്വത്തോടെ ഭരിക്കുന്നു. (കാനോന) നിത്യനായ നിന്നെ ഞങ്ങള്‍ ആരാധിക്കുന്നു.

കര്‍ത്താവു മഹത്വത്തോടെ ഭരിക്കുന്നു
അവിടുന്നു ശക്തിയും ബലവുമുള്ളവനായി.

ഇളകാത്ത വിധം ഭൂമിയെ സൃഷ്ടിച്ചു:
അതിനെ അവിടുന്ന് ഉറപ്പിച്ചു നിര്‍ത്തി

യുഗങ്ങള്‍ക്കെല്ലാം മുമ്പുതന്നെ
അങ്ങേ സിംഹാസനം സുസ്ഥിരമാണല്ലോ.

കര്‍ത്താവേ, അങ്ങുന്നനാദിയാകുന്നു:
നദികളില്‍ ഓളങ്ങളുണ്ടാവുകയും
അവ ഇരമ്പിക്കയറുകയും ചെയ്തു.

കടലിലെ തിരമാലകളെക്കാളും
മലവെള്ളത്തിന്റെ മുഴക്കത്തെക്കാളും
ഉന്നതങ്ങളില്‍ കര്‍ത്താവു ശക്തനാണല്ലോ.

അങ്ങേ നിയമങ്ങള്‍ വിശ്വാസ്യങ്ങളാകുന്നു:
വിശുദ്ധി അങ്ങേ ഭവനത്തിനു ചേര്‍ന്നതാകുന്നു.

(സങ്കീ. 150) കര്‍ത്താവിന്റെ വിശുദ്ധ ഭവനത്തില്‍
അവിടുത്തെ സ്തുതിക്കുവിന്‍.

പ്രതാപം നിറഞ്ഞ ആകാശത്തില്‍
അവിടുത്തെ പ്രകീര്‍ത്തിക്കുവിന്‍

കര്‍ത്താവിന്റെ ധീരകൃത്യങ്ങളെക്കുറിച്ച്
അവിടുത്തെ സ്തുതിക്കുവിന്‍.

കര്‍ത്താവിന്റെ ഉന്നതമഹിമാവിനെക്കുറിച്ച്
അവിടുത്തെ സ്തുതിക്കുവിന്‍

കാഹളമൂതിക്കൊണ്ട് അവിടുത്തെ സ്തുതിക്കുവിന്‍:
വീണകളാലും കിന്നരങ്ങളാലും അവിടുത്തെ സ്തുതിക്കുവിന്‍

തപ്പുകളാലും മദ്ദളങ്ങളാലും അവിടുത്തെ സ്തുതിക്കുവിന്‍
ഇമ്പമുള്ള തന്ത്രികളാല്‍ അവിടുത്തെ സ്തുതിക്കുവിന്‍.

കര്‍ണ്ണാനന്ദകരമായ കൈത്താളങ്ങളാല്‍ അവിടുത്തെ സ്തുതിക്കുവിന്‍
ആരവം കൊണ്ടും ആര്‍പ്പുവിളി കൊണ്ടും അവിടുത്തെ സ്തുതിക്കുവിന്‍.

സര്‍വ്വജീവജാലങ്ങളും കര്‍ത്താവിനെ സ്തുതിക്കട്ടെ.

പിതാവിനും പുത്രനും പരിശുദ്ധാത്മാവിനും സ്തുതി
ആദിമുതല്‍ എന്നേയ്ക്കും ആമ്മേന്‍

മ്‌ശം: (കാനോനാ) എല്ലാ ശ്വാസോഛാസത്തിലും നമുക്കു കര്‍ത്താവിനെ സ്തുതിയ്ക്കാം. പ്രകാശമായ മിശിഹായേ, ഞങ്ങള്‍ നിന്നെ സ്തുതിയ്ക്കുന്നു.
നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: നിത്യമായ പ്രകാശവും പിതാവിന്റെ തേജസ്സുമായ മിശിഹായേ, മനുഷ്യവര്‍ഗ്ഗത്തിന്റെ നവീകരണത്തിനും രക്ഷയ്ക്കും വേണ്ടി അങ്ങു ലോകത്തിലുദിക്കയും നിത്യജീവന്റെ ആശാകിരണങ്ങള്‍ വീശുകയും ചെയ്തു. അങ്ങേക്കു സ്തുതിയും ബഹുമാനവും കൃതജ്ഞതയും ആരാധനയും ഞങ്ങള്‍ സമര്‍പ്പിക്കുന്നു. സകലത്തിന്റെയും നാഥാ, എന്നേക്കും.

സമൂ: ആമ്മേന്‍

ഒനീസാ ദ്സപ്രാ (കാലത്തിന്റേത്)

അല്പം കാക്കുക; ഇന്നത്തെ കീര്‍ത്തനത്തിനായി തിരയുന്നു...

ബ്മദ്നാഹൈ സപ്രാ (പ്രഭാതകീര്‍ത്തനം)
(രീതി: മെത്തോല്‍ദ് മറിയം ബ്സുല്‍ത്താ)

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: ഞങ്ങളുടെ ദൈവമായ കര്‍ത്താവേ, സൃഷ്ടികളെല്ലാം അങ്ങേ ആഗമനം കാത്തിരിക്കുന്നു. സ്വര്‍ഗ്ഗമാകുന്ന ഓറെശ്ളത്ത് അങ്ങേ വിശുദ്ധരോടുകൂടെ നിത്യാനന്ദമനുഭവിക്കുവാന്‍ ഞങ്ങളെ അര്‍ഹരാക്കണമേ. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍

ബാറെക് കൊലഹോന്‍ (കൃതജ്ഞതാഗാനം)
(മൂന്നു ബാലന്മാരുടെ കീര്‍ത്തനം - രീതി: തൂയൈ...)

സര്‍വ്വചരാചര സൃഷ്ടികളേ,
അരിയമനോജ്ഞനഭസ്തലമേ,
കര്‍ത്താവാം പരമോന്നതനെ
വാഴ്‌ത്തിപ്പാടി നമിച്ചിടുവിന്‍.

(തറ്ആ)

മൃതരെയുയര്‍പ്പിച്ചര്‍ഹതപോല്‍
പ്രതിഫലമീശന്‍ നല്കീടും
മോഹനനിത്യവിഭാതത്തെ
വാനവരൊത്തു വണങ്ങീടാം.

വാനവ ദൂതജനാവലിയേ,
സൈനികഗണമേ, ജലധികളേ,
കര്‍ത്താവാം...

മഴയേ, മഞ്ഞേ, താരകളേ,
ചൂടേ, കാറ്റേ, എരിതീയേ,
കര്‍ത്താവാം...

പനിമതിയേ, നല്‍പകലോനേ,
രാവേ, പകലേ, ഇരുള്‍നിരയേ,
കര്‍ത്താവാം...

മേഘാവലിയേ, കുന്നുകളേ,
ഗിരിനിരയേ, തൃണജാതികളേ,
കര്‍ത്താവാം...

തെളിനീരേകും തടിനികളേ,
അരുവികളേ, ജലജീവികളേ,
കര്‍ത്താവാം...

പക്ഷിമൃഗാദികളേ, നരരേ,
ഇസ്രായേലിന്‍ വംശജരേ,
കര്‍ത്താവാം...

ധാര്‍മ്മികരേ, വിനയാന്വിതരേ,
നിഷ്‌കല്‍മഷരേ, വൈദികരേ,
കര്‍ത്താവാം...

ദൈവികഭവന നിവാസികളേ,
സഹദാമാരേ, പ്രേഷിതരേ,
കര്‍ത്താവാം...

മിന്നും മിന്നല്‍പ്പിണരുകളേ,
ചൂടേ, കുളിരേ, തരുനിരയേ,
കര്‍ത്താവാം...

ഇസ്രായേലിന്‍ വത്സലരേ,
ഹന്നനിയായേ, സഖിമാരേ,
കര്‍ത്താവാം...

(തറ്ആ)

താതനുമങ്ങേയാത്മജനും
റൂഹായ്‌ക്കും സ്തുതിയുയരട്ടെ.
ആദിമുതല്‍ക്കെന്നതുപോലെ
ആമ്മേനാമ്മേനനവരതം.

നശ്വരമാമീലോകത്തില്‍
നാഥാ, നീ കാത്തരുളണമേ
വരുവാനുള്ളൊരു വിധിനാളില്‍
സംരക്ഷകനായ് മേവണമേ.

അരിയ വിഭാതമുദിക്കുമ്പോള്‍
നിന്‍കൃപ ദര്‍ശനമരുളുമ്പോള്‍
തന്നരുളീടാന്‍ കനിയണമേ
ഞങ്ങള്‍ക്കുതകും വിഭവങ്ങള്‍.

സത്യവെളിച്ചം നീയാണെ-
ന്നറിയുകയാല്‍ നിന്നാഗമനം
സതതം കാത്തു കഴിക്കുന്നു
വാനവഗണവും മാനവരും.

മ്‌ശം: നമുക്കു പ്രാര്‍ത്ഥിയ്ക്കാം, സമാധാനം നമ്മോടുകൂടെ.

സ്ലോസാ

കാര്‍മ്മി: കര്‍ത്താവേ, അങ്ങേ നാമം പരിശുദ്ധമാകുന്നു; അങ്ങേ ആലയം പരിശുദ്ധമാകുന്നു; അങ്ങയെ ആരാധിക്കുന്ന സ്വര്‍ഗ്ഗവാസികള്‍ പരിശുദ്ധരാകുന്നു. ഞങ്ങളുടെ ഹൃദയമാകുന്ന ദേവാലയത്തെ അങ്ങു പവിത്രീകരിക്കേണമേ. ഞങ്ങളുടെ മനഃസാക്ഷിയെ നിര്‍മ്മലമാക്കണമേ. ഞങ്ങളുടെ പാപങ്ങള്‍ മോചിക്കണമേ. സകലവും വിശുദ്ധീകരിക്കുന്ന ദൈവമേ, പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍
മ്‌ശം: കര്‍ത്താവേ, അനുഗ്രഹിക്കണമേ.

ഹാസാ
(സഹജപം)

കാര്‍മ്മി: കര്‍ത്താവേ, കാരുണ്യപൂര്‍വ്വം ഞങ്ങളെ അനുഗ്രഹിക്കയും ആപത്തുകളില്‍ നിന്നു കാത്തുരക്ഷിക്കയും ചെയ്യണമേ. സ്നേഹം നിറഞ്ഞ അങ്ങേ പരിപാലനയുടെ തണലില്‍ ഞങ്ങളെ സംരക്ഷിക്കണമേ. പിതാവും പുത്രനും പരിശുദ്ധാത്മാവുമായ സര്‍വ്വേശ്വരാ, എന്നേയ്ക്കും.

സമൂ: ആമ്മേന്‍
മ്‌ശം: കര്‍ത്താവേ, അനുഗ്രഹിക്കണമേ.

ദ്ഉദ്റാനാ
(സഹായാഭ്യര്‍ത്ഥന)

ഹുത്താമ്മാ
(മുദ്രവയ്‌ക്കല്‍ പ്രാര്‍ത്ഥന)

കാര്‍മ്മി: ദൈവത്തിനു സ്തുതിയും മാലാഖാമാര്‍ക്കു വണക്കവും സാത്താനു ലജ്ജയും സ്ലീവായ്‌ക്കു വന്ദനവും തിരുസ്സഭയ്‌ക്കു മഹത്വവും മരിച്ചവര്‍ക്ക് ഉയിര്‍പ്പും അനുതാപികള്‍ക്ക് പൊറുതിയും തടവുകാര്‍ക്ക് മോചനവും രോഗികള്‍ക്ക് ആരോഗ്യവും ലോകത്തിനു ശാശ്വതമായ സമാധാനവും കൈവരട്ടെ. പാപികളും ബലഹീനരുമായ ഞങ്ങള്‍ക്കും ലോകത്തിലുള്ള സകല സൃഷ്ടികള്‍ക്കും ദൈവത്തിന്റെ കൃപയും അനുഗ്രഹവും സമൃദ്ധമായി ലഭിക്കുമാറാകട്ടെ. ഇപ്പോഴും + എപ്പോഴും എന്നേയ്ക്കും.

സമൂ: ആമ്മേന്‍

specialDays

Help viewing the page

2009-04-10T06:43:00.005+05:30

Help viewing the page

If your operating system and browser are not configured correctly, all you might see in these pages are thousands of empty squares, or badly rendered Malayalam.

If you are having trouble, let me first set your expectation on how this page could look like, and then guide you through the process.

This is how the blog looks like in my Ubuntu Linux (you may click the image to enlarge it):

This is how it looks in my Windows XP (you may click the image to enlarge it):

Now that I've shown you how the page could look like, lemme guide you to get your browser to display it as close as possible.

Windows users, pls visit http://vfaq.blogspot.com/2005/04/essentials-on-using-malayalam-unicode.html where Cibu has explained a 10-step process to get a better Malayalam rendering in your browser. The discussions and links on that page could help with any other issues you might face too.

Again, due to differences in operating systems and versions, fine tuning might still be required to get the best malayalam rendering - but, the above 10-pointer should give you quite a "readable" page. If you are using windows, you could add to the rendering at an O/S level, with the following steps after the 10 above:
1. Go to Control Panel
2. Open "Regional & language options"
3. Click on the "Languages" tab
4. Check the box against "Install files for complex script & right-to-left languages"
5. Hit "Apply", and it would configure your system to read complex scripts like malayalam better. (depending on your system installation, it might prompt you to point it where the "i386" folder is, from your windows installation)
6. Restart the system, and your system is all geared up for Malayalam.

If your O/S is linux, check out http://www.offlineblog.net/2008/06/how-to-read-malayalam-on-gnu-linux-how-to-read-malayalam-malayalam-computin/ for instructions.

If nothing works, do feel free to drop me a line below :-) I'll help you out.

ഒനീസാ ദ്സപ്രാ - ഉയിര്‍പ്പുകാലം

2008-04-01T01:36:00.027+05:30

ഉയിര്‍പ്പുകാലം: ഞായര്‍
(രീതി: ബ്രികീത്തോന്‍ / കര്‍ത്താവില്‍ ഞാന്‍ ദൃഢമായി...)

1 കൊറി. 15:54വിജയം മരണത്തെ ഗ്രസിച്ചു

തിരുലിഖിതങ്ങളിലെ
വചസ്സുകളന്യൂനം
മഹിയില്‍ നിറവേറി
നമ്മുടെ പാപം നിഹനിപ്പാന്‍
ജീവന്‍ സ്വയമവനര്‍പ്പിച്ചു
1 കൊറി. 15:4വിലിഖിതമായതു പോലവനാ-
കല്ലറ വിട്ടിഹ മൂന്നാം നാള്‍
മഹിമയൊടേ - ജീവന്‍ പ്രാപിച്ചു.

സങ്കീ. 49:1ജനങ്ങളേ, നിങ്ങളെല്ലാവരും ഇതു ശ്രവിക്കുവിന്‍

കര്‍ത്താവെന്നിഹ നാം
രക്ഷകനീശോയെ
റോമാ. 10:9നാവാല്‍ വാഴ്ത്തിടുകില്‍
ദൈവം കൃപയാല്‍ മൃതരില്‍ നി-
ന്നവനുത്ഥാനം നല്‍കിയതായ്
ഉള്‍ത്താരിങ്കലുറപ്പോടെ
വിശ്വാസം നിലനിര്‍ത്തിടുകില്‍
നാമെന്നും - ജീവന്‍ നേടീടും.

പിതാവിനും പുത്രനും പരിശുദ്ധാത്മാവിനും സ്തുതി

അര്‍പ്പിക്കുന്നു നാം
മിശിഹാ കര്‍ത്താവില്‍
നമ്മുടെ പ്രത്യാശ
ഭൗമിക ജീവിതസീമകളില്‍
നാമതു പരിമിതമാക്കിടുകില്‍
ഇതരജനങ്ങളിലധികം നാം
1 കൊറി. 15:19ദുഃസ്തിതിയില്‍ നിപതിച്ചീടും
ആ നിലയോ - പാരം ദയനീയം.

]]>

ഉയിര്‍പ്പുകാലം: തിങ്കള്‍
(രീതി: തൂയൈ...)

യോഹ. 15:5എന്നെക്കൂടാതെ ഒന്നും ചെയ്യുവാന്‍ നിങ്ങള്‍ക്കു
സാധിക്കുകയില്ല

വാതില്‍ നിയതം ഞാനാണീ
വാതിലിലുടകമെത്തിടുവോര്‍
യോഹ. 10:7രക്ഷയുമുയിരും കണ്ടെത്തും
വാരൊളിവീശി വിരാജിക്കും.

യോഹ. 15:4നിങ്ങള്‍ എന്നില്‍ വസിക്കുവിന്‍

എന്നില്‍ നിങ്ങള്‍ നിവസിക്കില്‍
നിവസിക്കും ഞാന്‍ നിങ്ങളിലും
മുന്തിരിശാഖ തരില്ല ഫലം
യോഹ. 15:4ചെടിയില്‍ നിന്നും വേര്‍പെട്ടാല്‍ .

പിതാവിനും പുത്രനും പരിശുദ്ധാത്മാവിനും സ്തുതി

1 തിമോ. 2:5നിജരക്തത്തിന്‍ മറുവിലയാല്‍
മര്‍ത്യനു രക്ഷ പകര്‍ന്നവനേ,
നിഖിലേശന്‍ തന്‍ സന്നിധിയില്‍
നീയാണേകന്‍ മദ്ധ്യസ്ഥന്‍ .

]]>

ഉയിര്‍പ്പുകാലം: ചൊവ്വ
(രീതി: തൂയൈ...)

1 റോമാ. 5:20പാപം ഏറിയിടത്ത് കൃപയും വര്‍ദ്ധിച്ചു

ആദം തന്റെ ശരീരത്താല്‍
മാനവരാശിയെ നിഹനിച്ചു.
മിശിഹാ തന്റെ ശരീരത്താല്‍
മര്‍ത്യനു ജീവന്‍ പുനരേകി

യോഹ. 18:14ജനത്തിനു വേണ്ടി ഒരു മനുഷ്യന്‍ മരിക്കുന്നതു
നല്ലതാകുന്നു.

പണ്ടു വധിച്ചു പുരോഹിതരാ-
നിത്യപുരോഹിതനീശോയെ
നിസ്തുലമാബലി മാനവനായ്
നിത്യനികേതനമരുളുന്നു.

പിതാവിനും പുത്രനും പരിശുദ്ധാത്മാവിനും സ്തുതി

ശാശ്വതജീവന്‍ നല്‍കിടുവാന്‍
നാഥനു നിതരാമധികാരം
യോഹ. 17:2നല്‍കിയ താതാ, സകലേശാ
ഞങ്ങള്‍ നിന്നെ നമിക്കുന്നു.

]]>

ഉയിര്‍പ്പുകാലം: ബുധന്‍
(രീതി: തൂയൈ...)

യോഹ. 19:27ഇതാ നിന്റെ അമ്മ

കര്‍ത്താവേ, നിന്‍ ജനനിയിലാ-
ശിഷ്യന്‍ നിന്നെ ദര്‍ശിച്ചു.
മാതാവോ തന്‍ തനയനെയാ-
ശിഷ്യനിലന്‍പൊടു കണ്ടെത്തി.

സങ്കീ. 46:4അത്യുന്നതന്റെ വാസസ്ഥലം പരിശുദ്ധമാകുന്നു

നിര്‍മ്മലഹൃദയ നികേതത്തില്‍
വാഴും നീയെന്നറിയിക്കാന്‍
നീ നിവസിച്ചോരാലയമാ
ശിഷ്യന്‍ വിരവൊടു മാനിച്ചു.

പിതാവിനും പുത്രനും പരിശുദ്ധാത്മാവിനും സ്തുതി

അന്യരിലീശ്വര ചൈതന്യം
ഞങ്ങളുമീമട്ടന്യുനം
കണ്ടെത്തിടുവാന്‍ കര്‍ത്താവേ,
കരുണാമയനേ, കനിയണമെ.

]]>

ഉയിര്‍പ്പുകാലം: വ്യാഴം
(രീതി: തൂയൈ...)

യോഹ. 2:27നിങ്ങള്‍ അവനില്‍ വസിക്കുവിന്‍

മിശിഹായോടൊത്തിഹ നിങ്ങള്‍
മൃതരില്‍ നിന്നുമുയിര്‍ത്തെങ്കില്‍
താതനൊടൊപ്പമവന്‍ വാഴും
കൊളോ. 3:1വാനിടമെന്നും തേടിടുവിന്‍

ഫിലി. 5:20നമ്മുടെ സേവനം സ്വര്‍ഗ്ഗത്തിലാകുന്നു

നാഥനോടൊത്തു നിരാമയനില്‍
ജീവന്‍ നിഭൃതമടക്കിയ നാം
കൊളോ. 3:12ഭൗമികചിന്ത വെടിഞ്ഞു പരം
ദൈവികമായതു തേടേണം.

പിതാവിനും പുത്രനും പരിശുദ്ധാത്മാവിനും സ്തുതി

നമ്മുടെ ജീവന്‍ മിശിഹായാ-
ണന്ത്യവിധിക്കവനെത്തുമ്പോള്‍
അവനോടൊത്തു മഹത്വത്തില്‍
കൊളോ. 3:4പങ്കാളികളയ്ത്തീരും നാം.

]]>

ഉയിര്‍പ്പുകാലം: വെള്ളി
(രീതി: ബ്രികീത്തോന്‍ / കര്‍ത്താവില്‍ ഞാന്‍ ദൃഢമായി...)

സങ്കീ. 132:1എത്ര വിശിഷ്ടവും മനോഹരവുമാകുന്നു

കുഞ്ഞാടനവരതം
നമ്മുടെ കര്‍ത്താവിന്‍
പ്രതിരൂപം മന്നില്‍ .
മൃതനാകിലുമൊരു കുഞ്ഞാടിന്‍
De virg. 11/18ചര്‍മ്മം കൊണ്ടു സമാവൃതമാം
വാദ്യം വഴിയായ് സ്വരമധുരം
ചൊരിയും നമ്മുടെ കാതുകളില്‍
സുവിശേഷം - നിത്യം മധുതൂകും.

1 കൊറി. 15:22മിശിഹാ മൂലം സകലരും ജീവിക്കുന്നു

മൃത്യുവിലധികാരം
സാത്താനൊരുകാലം
ഹെബ്രാ. 2:14-15നിലനിര്‍ത്തീടുകിലും
കര്‍ത്താവേ, നിന്‍ മരണത്താല്‍
അവരുടെ മേല്‍ നീ ജയമാര്‍ന്നു.
മരണഭയത്താലാകുലരാ-
യടിമത്തത്തിലമര്‍ന്നവരെ
നാഥാ, നീ - പരിചില്‍ മോചിച്ചു.

പിതാവിനും പുത്രനും പരിശുദ്ധാത്മാവിനും സ്തുതി

മഹിമയുമുന്നതമാം
ബഹുമതിയും ദൈവം
നാഥനു നല്‍കി സദാ-
എന്നാലനുപമ കൃപയാലേ
നിഖിലജനത്തിനുമായിളയില്‍
നാഥന്‍ മരണം പുല്‍കിടുവാന്‍
തിരുമനസ്സായെന്നറിവൂ നാം
അവനെന്നും - സ്തോത്രം പാടീടാം.

]]>

ഉയിര്‍പ്പുകാലം: ശനി
(രീതി: തൂയൈ...)

സങ്കീ. 32:1കുറ്റത്തിനു മാപ്പു കിട്ടിയവന്‍ ഭാഗ്യവാനാകുന്നു

മര്‍ത്ത്യസ്വഭാവവിശേഷത്തെ
മന്നില്‍ പാപം നിഹനിച്ചു
മിശിഹായോ തന്‍ സ്ലീവായാല്‍
പാപത്തെയും നിഹനിച്ചു.

ഗലാ. 5:14ഞാന്‍ ലോകത്തിനു കുരിശില്‍
തറയ്ക്കപ്പെട്ടിരിക്കുന്നു

കല്പനയാം മുള്‍മുടിചൂടീ-
ട്ടുപവാസത്തിന്നാണികളില്‍
ക്രൂശിതരാകാം സ്നേഹത്തില്‍
നാഥനോടൊത്തു നമുക്കിളയില്‍

പിതാവിനും പുത്രനും പരിശുദ്ധാത്മാവിനും സ്തുതി

നാഥാ, താവക പീഢകളെന്‍
മനസ്സിനു നല്‍കുന്നാനന്ദം
കര്‍ത്താവേ, നിന്‍ കുരിശല്ലോ
മമ വിജയത്തിന്‍ മണിമകുടം.

]]>

ഒനീസാ ദ്സപ്രാ - മംഗലവാര്‍ത്തക്കാലം

2008-01-01T04:52:00.003+05:30

ഒനീസാ ദ്സപ്രാ
(പ്രഭാതഗാനം)

മംഗലവാര്‍ത്തക്കാലം: ഞായര്‍
(രീതി: തൂയൈ...)

സങ്കീ. 46:2ശക്തനായ കര്‍ത്താവു നമ്മോടുകൂടെ

മഹിയില്‍ വന്നു പിറന്നവനേ,
മഹിമനിറഞ്ഞ പരാപരനേ
നിന്മുഖദര്‍ശന ഭാഗ്യത്തില്‍
നരതതി വിസ്മയപൂരിതരായ്.

സങ്കീ. 12:4നീതിമാന്മാര്‍ക്ക് അന്ധകാരത്തില്‍ പ്രകാശമുദിച്ചു

നാഥാ, നീ വെളിവാക്കിയ നിന്‍
മര്‍ത്ത്യസ്വഭാവം ധരയഖിലം
പൊല്‍‌പ്രഭ ചിന്തി ലസിക്കട്ടെ
മര്‍ത്ത്യരതിന്നൊളി ചൂടട്ടെ.

പിതാവിനും പുത്രനും പരിശുദ്ധാത്മാവിനും സ്തുതി

നാഥാ, നീതിക്കുറവിടമാം
നിന്നിലെരിഞ്ഞു വിളങ്ങീടും
ദൈവികതേജസ്സനവരതം
മന്നില്‍ കാന്തി പരത്തട്ടെ.

മംഗലവാര്‍ത്തക്കാലം: തിങ്കള്‍

മംഗലവാര്‍ത്തക്കാലം: ചൊവ്വ

മംഗലവാര്‍ത്തക്കാലം: ബുധന്‍

മംഗലവാര്‍ത്തക്കാലം: വ്യാഴം

മംഗലവാര്‍ത്തക്കാലം: വെള്ളി

മംഗലവാര്‍ത്തക്കാലം: ശനി